ده كلام.. طب الشعب فين!!
أوت 27, 2007 في 3:38 م · مصنف تحت أخبار الأمارات
كانت شي عايلة هندية في استراليا .. المهم أول ما شافونا جان ايون ويسألونا عن المطاعم الموجودة في استراليا .. خبرناهم وعقب جان يسألونا انتو من وين جان نقولهم من الامارات .. قالو اوووه نحن بعد من الامارات ومن الشارجة !! وتقريبا نفس الموقف مع عايلة مصرية كانوا يسألونا وجي وسألونا عن الامارات وعدد سكان الامارات وخبرناهم وجان ينصدمون كيييف نسبة المواطنين 25% .. وقال هالجملة .. ده كلام طب الشعب فين (وأنا اقول الشعب انقرض)
كل يوم نسبة العمالة الوافدة تزيد .. جنسيات غريبة وعجيبة .. قامو يستقون علينا .. استوينا نحن الفقارى اللي نشتغل عندهم .. لا احترام لا تقدير .. ولا جنه هاي بلادنا وهم الضيوف ..
أنا ماكنت اقول هالرمسة ولا كنت احب اقولها لكن من اللي نشوفه كل يوم .. ماابى اكتب أكثر عن جيه عسب ما أغلط
بس الله يعينا..
رابط دائم
UAE 
dubai85 said
السلام عليك أخوي ..
والله المشكلة صارت “عويصة” ..من فتحوا باب “التطور و الانفتاح” شفنا العالم كله هاب في الامارات عامة و دبي خاصة ..!!
اذا ودهم بالرقي .. و ودهم بالتطور .. و العمران ..ماشيء الا الاحتكاك بالعالم الآخر ..!!
شوف المهرجنات ..شوف الاحتفالات في الدولة ..هاي كلها تشجع العالم على أنها تسكن في الامارات ..!!
لكن في الآخير المواطن “ماكل هواء” ..أنا مب ضد التطور ..و مب ضد ان نكون دولة ترحب بالجميع .. و لكن “الزحمة و الجرائم و البطالة و غيرها ” يالسة تتزايد ..!!
ترى وراء كل انفتاح ..قبل لا يكون هناك شيء ايجابي ..هناك وايد سلبيات ..
بس ما نقول غير الله يحفظ بلادنا و يحفظ أهلها ..!!
alamiri said
مشكورة أختي عالمرور الجميل.. ومثل ما قلتي المشكلة صارت عويصة.. وانا اشوف سلبياتها اكثر بوايد عن ايجابياتها
وكل مانسافر ونسير مكان يسألونا عن بلادنا .. طبعاً نستانس وجيه بس عقب يخبرونا انهم يبون ايون بلادنا (وأنا اقول فخاطري لاااااا مب ناقصين) 😀
الله يعينا
female said
من جد والله الأمارات كلها أجانب وجاليات
وكل الناس اللي تروح لها تقول كلها أجانب
ما ندري وين ” الأماراتيين ” ؟!!
خصوصا في دبي ؟!!
صراحة انا مره منقهره >> وش دخل لك
الله يعينكم
فتاة الحزن said
أنا مستغربة الدول الثانية متطورة .بس عندهم طفحان في السكان أنا أقصد دول العالم المتقدم .. هي أخطاء تراكمت والحين نشوف أثرها ..
🙂
alamiri said
شو نسوي نحن استوينا عملة نادرة .. اشوي وبيحطونا في المتاحف عسب يحافظون علينا
تسلمون عالمرور .. والله يعينا
أراميا said
هذا موضوع مهم
و أنا شخصيا عملت بحث لكورس في الجامعة عن العمالة الآسيوية في دول الخليج العربي و الإمارات و كان بعنوان الغزو الآسيوي على دول الخليج
المشكلة الحين ما صاروا بس آسيويين ..صاروا من كل دول العالم..
ما شي حل لهالمشكلة إلا إن المواطنين يزيدون النسل ..بس المشكلة مع هالغلاء ما يقدرون
والله الواحد ما يعرف شو يسوي..أنا أعتقد إني بعد كم سنة بهاجر 🙂 ههههههه
ما أقدر أعيش هنا و أشوف الوافدين و الأجانب في كل مكان
alamiri said
100% مع زيادة الاسعار كل عايلة تقول 3 ولا 4 عيال كفاية مانقدر نتحمل مصاريفهم.. واللي يقول جيه شوي مقتدر واللي موول ماعنده مايفكر ايب اكثر عن 2
الله كريم
عابر سبيل said
ياخوي إذا كان المواطن المسكين يحسب ألف حساب عشان يفكر بانجاب طفل فكيف تزيد نسبة المواطنين ؟
إذا كان المواطن يعطى علاوة 600 درهم في أحسن الأحوال لكل طفل ، ويسمع عن دول تعطي آلاف الدولارات فكيف يزيد ؟
وإذا كان الشباب عندنا لا يستطيعون الزواج إلا بعد الخامسة والعشرين !
الله المستعان
ونتأمل خيرا بعد قرار نائب رئيس الدولة الشيخ محمد بن راشد حفظه الله بإنشاء مجلس للتركيبة السكانية
وبانتظار قراراتهم
alamiri said
تسلم أخوي عالمرور المرور الجميل
ومعاك حق .. ومثل ما قلت في انتظار قرارات مجلس التركيبة السكانية لأن مانقدر نسوي شي ثاني
وان شالله خير
ســالم الامــــــارات said
سلام اخي الكريم
هاي مشاركتي الاولى في مدونتك اتمنى اكون ضيف خفيف ….
صراحة هذا موضوع كبير جدا جدا جدا
انا عندي ارقام ونسب تبين عدد الجنسيات في الامارات واعداد ونسبهم بالامارات بس لو حطيتها يمكن اتكون مفاجاه للكثيرين فمافي داعي لهذا الامر…
المشكلة اننا لسنا امام مشكلة واحده فقط وهي نسب الوافدين هنالك مشاكل اخرى تبعتها او ذو صلة بها !؟ وهي مشكلة التركيبة السكانية !
المطالبة بجنسية الدولة من كثير من الجنسيات المتواجدة بالدولة وسيرو الجوازات وجوفو
الغلاء فالبلد دفع الكثير من الاجانب الى ترحيل اسرهم …بقو العزابية فالبلد ! شو بيكون تاثيرهم على مجتمعنا !؟
قلة فرص الوظائف للمواطنين لانهم اغلى من الاجانب ! والي يقول لا وهل شي مب موجود والمواطن فرصه اكبر بقوله هذا الشي يمكن يكون بدا من هل سنه …الله يطول في عمر شيوخنا ولا لو انتركت للمسئولين نفس قبل كان الوضع بيستمر نقمة على المواطنين.
الكثير من ابناء الامارات اصبحو يتخلون عن عاداتهم وتقاليدهم ولبسهم وتصرفاتهم …طبيعي لازم بيتاثرون من الناس الي حولهم !!؟
واشياء وايد مابي ادخل فيها عن يزعل الاخ الاميري يقول هذا اول مرة وجي شو بيسوي جدام !؟ لول
تحياتي وتدوينه طيبة
alamiri said
حياك الله أخوي في مدونتي البسيطة .. اسعدني تواجدك
يوم ردينا من مطار دبي شفنا جنسيات افريقية داخلة البلاد .. باعداد كبيرة محد بيتصور شكثر ياين الامارات !! وهم معروفين بالدجل والنصب والاحتيال عالناس .. انزين لييش ندخلهم البلاد!!
مثل ما قلت هي مب مشكلة وحده .. الزحمة ، الغلاء، ارتفاع عدد الجرائم،وغيره وغيره … وأنا مااشوف أي حلول كل يوم المشاريع يالسة تزيد في كل امارات الدولة وطبعا هالمشاريع لجذب الأجانب!!
الله يعينا ومشكور مرة ثانية عالمشاركة الجميلة
أدهم said
إرتفاع الأسعار مشكلة ليس لها حل إلا بالرجوع إلا الله 🙂
يعطيك ألف عافية 🙂
تحياتي العطره
alamiri said
تسلم أخوي عالمرور الجميل .. وكثل ما قلت لا حل لها الا بالرجوع الا الله..
والله كريم